ភ្នំពេញ៖ គណបក្សហ៊្វុនស៊ិនប៉ិចបានចេញសេចក្ដីប្រកាសព័ត៌មានច្រានចោលសេចក្ដីប្រកាសមួយកាលពីថ្ងៃទី១៣ ធ្នូ ម្សិលមិញដែលថាគណបក្សមិនទាន់សម្រេចពីបេក្ខភាពប្រធានគណបក្សនោះទេ ថាជាការបង្កើតឡើងដោយបុគ្គលមួយចំនួនតូច និងមិនបង្ហាញពីឆន្ទៈរបស់គណបក្សនោះទេ។ គណបក្សក៏នឹងចាត់វិធានការចំពោះអ្នកដែលបង្កើតឱ្យមានការភ័ន្តច្រលំនេះផងដែរ។

ក្នុងសេចក្ដីប្រកាសព័ត៌មានចុះថ្ងៃទី១៤ ខែធ្នូ ឆ្នាំ២០២១នេះ គណបក្សហ៊្វុនស៊ិនប៉ិចបានបញ្ជាក់ថាបច្ចុប្បន្នសិទ្ធិសម្រេចរាល់ការងាររបស់បក្សទាំងអស់គឺស្ថិតនៅក្រោមការចាត់ចែងរបស់ព្រះអង្គម្ចាស់ នរោត្តម ចក្រាវុធ ដែលជាប្រធានស្ដីទីតែមួយអង្គប៉ុណ្ណោះ។ គណបក្សក៏បញ្ជាក់ផងដែរថា សេចក្ដីប្រកាសព័ត៌មាន ស្ដីពីលទ្ធផលនៃអង្គប្រជុំវិសាមញ្ញគណៈកម្មាធិការនាយកគណបក្សហ៊្វុនដែលចេញកាលពីថ្ងៃទី១៣ ខែធ្នូម្សិលមិញ ជាការរៀបចំរបស់បុគ្គលមួយចំនួនតូច ដែលបាត់បង់នីតិសម្បទា និងបាត់បង់សមាជិកភាពពីបក្សរួចទៅហើយមិនអាចតំណាងគណបក្សបាននោះទេ។

គណបក្សបានបញ្ជាក់ថា៖ «នឹងចាត់វិធានការផ្លូវច្បាប់យ៉ាងខ្លាំងក្លាបំផុត ចំពោះបុគ្គលដែលបានក្លែងបន្លំឋានៈ និងក្លែងឯកសារនានារបស់គណបក្ស ដែលធ្វើឱ្យមានការភ័ន្តច្រឡំដល់សមាជិក-សមាជិកាគណបក្ស និងសាធារណជន» ។

កាលពីម្សិលមិញមានសេចក្ដីប្រកាសមួយដែលអះអាងថាជាការសម្រេចសម្រេចរបស់អង្គប្រជុំវិសាមញ្ញគណៈកម្មាធិការនាយកគណបក្សហ្វ៊ុនស៊ិនប៉ិចដែលប្រកាសថាគណបក្សនៅមិនទាន់រកឃើញប្រធានថ្មី ដើម្បីបន្តពីសម្តេចក្រុមព្រះនៅឡើយទេ ដែលខុសពីការប្រការកន្លងទៅរបស់អ្នកនាំពាក្យគណបក្សដែលថាមានតែព្រះអង្គម្ចាស់ នរោត្តម ចក្រាវុធ តែមួយអង្គប៉ុណ្ណោះដែលនឹងត្រូវបោះឆ្នោតជ្រើសរើសក្នុងសមាជគណបក្សនៅក្នុងអំឡុងខែមករាខាងមុខ។

ជម្លោះផ្ទៃក្នុងគណបក្សហ្វ៊ុនស៊ិនប៉ិចចាប់ផ្ដើមកើតឡើងចេញពីការដណ្ដើមត្រាបក្សតាំងពីខែកញ្ញា ឆ្នាំ២០២១ កន្លងទៅ នៅ ពេលដែលមានមន្ត្រីជាន់ខ្ពស់គណបក្សមួយចំនួន បានចេញមុខប្រឆាំងនិងចោទម្ចាស់ក្សត្រី នរោត្តម ម៉ារី ថាបានប្រើប្រាស់ត្រាបក្សក្នុងការសម្រេចចិត្តដោយគ្មានការពិភាក្សាជាមួយអនុប្រធានបក្ស ហើយអនុប្រធានបក្សម្នាក់បានចេញមុខគាំទ្រអ្នកទាំងនោះផងដែរដែលធ្វើឱ្យការសម្រេចរបស់គណបក្សទាំងមូលមានលិខិតផ្សេងៗជំទាស់គ្នារៀងខ្លួន៕